ပုခက်လွှဲသော လက်များ တခေတ်ဆန်းချိန် ၂၀၁၂




ကမ္ဘာပေါ်မှာ အင်အားအကြီးမားဆုံးနဲ့ အကြာဆုံး ရပ်တည်နေနိုင်တဲ့ ဝါဒဟာ မဟာ ဖိုဝါဒပဲ ဖြစ်တယ်လို့ ကဗျာဆရာ ငြိမ်းဝေက ဆရာမ ဆစ်လ်ဗီယာ ပလပ်ရဲ့ ကဗျာကို ရေးစဉ်တုန်းက ရေးခဲ့ဘူးပါသည်။

အရှေ့အလယ်ပိုင်းဒေသမှာ အမျိုးသမီးလေးတွေ အခွင့်အရေးဆုံးရှုံးနေတာတွေ သိရ မြင်ရ ကြားရတိုင်း ဆရာ ငြိမ်းဝေပြောခဲ့ဘူးတဲ့ မဟာ ဖိုဝါဒ က ဦးနှောက်ထဲမှာ အလိုလိုရောက်လာတတ်ပါသည်။

သိပ်မကြာခင် ကာလတုန်းကလဲ CNN သတင်းဌာနရဲ့ သတင်းတွေထဲမှာ အာရပ်ကမ္ဘာက အမျိုးသမီးငယ်လေး တစ်ဦးရဲ့ သတင်းက နေရာယူနေတာကို တွေ့လိုက်ရပါသေးသည်။

မိုးရာသီကာလတစ်ခုမှာ အိမ်ကို အလည်လာတဲ့ အိမ်ထောင်သည်အမျိုးသားတစ်ယောက်ရဲ့ စော်ကားခြင်းကိုခံရပြီး ကိုယ်ဝန်ရှိလာချိန်မှာတော့ အာရပ်ကမ္ဘာရဲ့ ထုံးစံအတိုင်း ပြစ်ဒါဏ်ပေးအကျဉ်းချခံရတဲ့ သူမရဲ့ ဇာတ်လမ်းက အာရပ်တိုင်းပြည်တွေမှာ ကြားနေသိနေကျ မရိုးနိုင်တဲ့ ဇာတ်လမ်းတစ်ပုဒ်။

အကျဉ်းထောင်ထဲမှာ ကလေးမွေးပြီး ကလေးတနှစ်မပြည့်တပြည့်အချိန်မှာ သူမကို စော်ကားခဲ့ဘူးသူ အိမ်ထောင်သည်ကို လက်ထပ်ယူပါ့မယ်လို့ ကတိကဝတ်ပြုမှ အပြစ်က လွတ်ငြိမ်းချမ်းသာခွင့်ရတဲ့ အကြောင်း အင်တာဗျူးထားတဲ့ သူမရဲ့ သတင်းကို ကျွန်မနဲ့ အတူ ကြားသိရသူ အာရပ်လူမျိုး သူငယ်ချင်းမတွေကတော့ “ ဒါ ထုံးတမ်းအစဉ်အလာပဲ ပြစ်ဒဏ်ပေးရမှာပဲ “ လို့ ပြတ်ပြတ်သားသား မှတ်ချက်ချကြပါသည်။

တခါတရံမှာ ကျွန်မတို့လို အာရှတိုက်သူတွေနဲ့ အာရပ်တိုင်းပြည်က မိတ်ဆွေတွေကြားမှာ ညှိလို့မရတဲ့ အတွေးအမြင်တွေ ရှိနေတတ်ပါသည်။ အငြင်းပွားလို့ အကျိုးမရှိနိုင်တဲ့ အကြောင်းအရာတွေအတွက် သူငယ်ချင်းမတွေနဲ့ အငြင်းမပွားဖြစ်ပေမယ့် မဟာဖိုဝါဒတွေကိုတော့ ခါးခါးသီးသီး ဆန့်ကျင်လိုစိတ်တွေ ပေါ်လာခဲ့ဘူးပါသည်။

အသက်ရှင် ရပ်တည်နေသူချင်းအတူတူ ဆိုပေမယ့် မိန်းမတစ်ယောက်နဲ့ ယောက်င်္ကျားတစ်ယောက်ကြားမှာ ရှိနေတဲ့ လူ့အခွင့်အရေးတွေက တခါတရံမှာ သိသိသာသာ တခါတရံမှာ မသိမသာ ကွာဟနေတတ်ပါသည်။

အာရှနဲ့ အရှေ့တိုင်းမှာ မိန်းမတွေဟာ အစဉ်အလာတွေရဲ့ စည်းမျဉ်း ဘောင်တွေကြားမှာ ရှင်သန်ကြရသည်။

အရှေ့အလယ်ပိုင်း အာရပ်တိုင်းပြည်တွေမှာ မိန်းမတွေဟာ မဟာဖိုဝဒရဲ့ ဖိနှိပ်ခံ နင်းကြမ်းတွေ အဖြစ် ရှင်သန်ကြရသည်။

အနောက်တိုင်းမှာတော့ မိန်းမတွေဟာ မိန်းမတစ်ယောက်ရဲ့ လွတ်လပ်ခွင့်တွေကို ခံစားပြီး ရှင်သန်ကြရပါသည်။

ဒါပေမယ့် ကမ္ဘာပေါ်မှာ ရှိတဲ့ မိန်းမတွေထဲမှာ သြဇာအာဏာ ထိရှသူ ထူးချွန်ထက်မြက်သူ နိုင်ငံ့ခေါင်းဆောင် အမျိုးသမီးတွေကိုတော့ နေရာအနှံ့အပြားမှာ တွေ့နေရပါသည်။

၂၀၁၁ လက်ရှိ အချိန် အထိ ကမ္ဘာကို လွမ်းမိုးအုပ်ချုပ်သူ အမျိုးသမီးတွေကို စာရင်းပြုစုတော့ ဒိန်းမတ် နယ်သာလန်နဲ့ ဗြိတိန်နိုင်ငံ သုံးနိုင်ငံကို ဘုရင်မတွေက အုပ်စိုးတာကို တွေ့ရပါသည်။

အန်တီဂွာ သြစတေးလျနဲ့ စိန့်လူစီးယား သုံးနိုင်ငံမှာတော့ အမျိုးသမီး မြို့တော်ဝန်တွေကိုတွေ့ရပါသည်။

အာဂျင်တီးနား ဘရာဇီး ကော်စတာရီကာ ဖင်လန် အိန္ဒိယ အိုင်ယာလန် ကာစစ္စတန် လိုက်ဘေးရီးယား ဆွစ်ဇာလန် လီသူရီးနီးယား နိုင်ငံတွေမှာ အမျိုးသမီး သမ္မတတွေ ခန့်အပ်ထားတာကိုတွေ့ရပါသည်။

သြစတေးလျ ဘင်္ဂလားဒေ့ရှ် ခရိုအေးရှား ဖင်လန် ဂျာမဏီ ထရီနီဒတ် တိုဘာဂို အိုက်စ်လန်း ဆန်မာရီနို ဆလိုဗေးနီးယား နိုင်ငံ တွေမှာ အမျိုးသမီးဝန်ကြီးချုပ်တွေကိုတွေ့ရပြန်ပါသည်။

မျက်မှောက်ကမ္ဘာမှာ အုပ်ချုပ်သူ အစိုးရ ထိပ်တန်းအရာရှိ စာရင်းထဲမှာ အမျိုးသမီးတွေကို မတွေ့ရတဲ့ နိုင်ငံရယ်လို့ရှားပါသည်။

ကုလသမ္မဂအဖွဲ့ဝင် နိုင်ငံပေါင်း တစ်ရာ့ သုံးဆယ်ကျော်မှာ အစိုးရ အုပ်ချုပ်ရေးပိုင်းမှာ အမျိုးသမီး အုပ်ချုပ်သူ အကြီးအကဲ မရှိတဲ့ နိုင်ငံ ၁၃ နိုင်ငံခဲ့ပါသည်။ အဲဒီ ၁၃ နိုင်ငံထဲမှာ မြန်မာနိုင်ငံလည်း တစ်နိုင်ငံ အပါအဝင် ဖြစ်ပါသည်။

လွတ်လပ်ရေးရပြီးစဉ်ကာလကစလို့ ၂၀၁၁ အထိ ၆၃ နှစ်ကာလအတွင်းမှာ မြန်မာအမျိုးသမီး ဝန်ကြီးအနေနဲ့ ကရင်ပြည်နယ် ပြည်နယ်ဝန်ကြီးချုပ်တစ်ဦးဟောင်းတစ်ဦး ဖြစ်တဲ့ ဒေါ်ဘမောင်ချိန် တစ်ဦးတည်းကိုသာ ၁၉၅၂ ခုနှစ်မှ ၁၉၅၄ ခုနှစ်အထိသာ သမိုင်းမှာ တွေ့မြင်ခဲ့ရဘူးပါသည်။

တကယ်တော့ အာရှက အမျိုးသမီးတွေဟာ အရှေ့အလယ်ပိုင်းက အမျိုးသမီးတွေထက် အမျိုးသမီးအခွင့်အရေး ပိုခံစားရသူတွေပါ။ လွတ်လပ်စွာ တွေးခေါ်မြော်မြင်နိုင်သူတွေပါ။ ပုခက်လွဲ ထမင်းချက် အလုပ်တွေထက် ပိုလို့အရေးကြီးတဲ့ နေရာတွေမှာ ရပ်တည်နိုင်စွမ်းသူတွေပါ။

မဟာဖိုဝါဒကို မလွန်ဆန်နိုင်ကြတဲ့ အီရတ် အစ္စရေး ဘာရိန်း ကာတာ ယူအေအီး ပါကစ္စတန် အာဖဂန်နစ္စတန် ရီမင် ဆော်ဒီအာရေးဗျ နိုင်ငံလို အမျိုးသမီးတွေ ဖိနှိပ်ခံနေရတဲ့ တိုင်းပြည်တွေမှာတောင် အမျိုးသမီး ခေါင်းဆောင်တွေနဲ့ ဝန်ကြီးချုပ်အဆင့်အထိရှိတဲ့ အမျိုးသမီးတွေကို အစိုးရ အဖွဲ့တွေမှာ တွေ့နေရပါသည်။

တောင်အာဖရိကနိုင်ငံမှာဆိုရင် အစိုးရအဖွဲ့ဝင် ၂၁ နေရာမှာ အမျိုးသမီး ၁၀ နေရာရရှိပြီး အမျိုးသား ၁၁နေရာ ရှိတာမို့ ၄၇ ရာခိုင်နှုန်းသော အမျိုးသမီးတွေနဲ့ နိုင်ငံရဲ့ အုပ်ချုပ်ရေး ယန္တယားကို လည်ပတ်နေတာကို အံ့သြစရာတွေ့ရပါသည်။

ဘိုလီးဗီးယားနိုင်ငံက အုပ်ချုပ်သူ အစိုးရအဖွဲ့ဝင်တွေထဲမှာ အမျိုးသမီးက ၅၀ ရာခိုင်နှုန်းနေရာယူထားတာကိုတွေ့ရပါသည်။ ပြင်သစ်အစိုးရအဖွဲ့မှာတော့ အမျိုးသမီးထုက အုပ်ချုပ်သူ အဖွဲ့အစည်းရဲ့ ၆၀ ရာခိုင်နှုန်းအထိ နေရာယူထားခဲ့ပါသည်။

၂၀၁၁ မှာတော့ ကမ္ဘာ့အမျိုးသမီးခေါင်းဆောင်တွေရဲ့ ခြေလှမ်းကို အာရှက အမီလိုက်လာကြတာကို အားတက်ဂုဏ်ယူဖွယ်ရာ တွေ့ရပါသည်။

တောင်ကိုးရီးယားသမ္မတနိုင်ငံမှာ ယခင်သမ္မတ ဟောင်းတစ်ဦးဖြစ်တဲ့ ပတ်ချွန်ဟီး ရဲ့ သမီးဖြစ်သူ ပတ်ဂျွန်ဟေးက ဖခင်ဖြစ်သူခြေရာကို နင်းပြီး သမ္မတဖြစ်လာနိုင်တဲ့ အလားအလာရှိနေပါသည်။

ဂျပန်နိုင်ငံရဲ့ ကာကွယ်ရေးဝန်ကြီးဟောင်း ယူရိကို ကိုကီဟာလဲ ဂျပန်နိုင်ငံရဲ့ ဝန်ကြီးချုပ်ဖြစ်ဖို့ အလားလာရှိသူတစ်ဦး အဖြစ် သတင်းမွှေးနေသူပဲ ဖြစ်ပါသည်။ သူမကတော့ အခြားအခြားသော နိုင်ငံရေးသမားများလို နိုင်ငံရေး ကျောထောက်နောက်ခံရှိတဲ့ အသိုင်းအဝိုင်းကပေါက်ဖွားလာသူမဟုတ်ခဲ့ပါ။

၂၀၁၂ မှာထိုင်ဝမ်နိုင်ငံရဲ့ ပထမဆုံး အမျိုးသမီး သမ္မတ ဖြစ်နိုင်ခြေရှိတဲ့ ချိုက်ယင်းဝံ ကတော့ လက်ရှိ ထိုင်ဝမ်နိုင်ငံရဲ့ ဒီမိုကရက်တစ် ပါတီခေါင်းဆောင်တစ်ဦးပဲ ဖြစ်ပါသည်။

အင်ဒိုနီးရှားနိုင်ငံရဲ့ စီးပွားရေး ဝန်ကြီးဟောင်း ဖြစ်သူ လက်ရှိ ကမ္ဘာ့ဘဏ်ရဲ့ ဦးဆောင်ညွှန်ကြားရေးမှူးဖြစ်တဲ့ စရီ မြူယာနီအင်ဒရာဝတီကိုလဲ နောင်လာမယ့် အင်ဒိုနီးရှားနိုင်ငံရဲ့ သမ္မတ အလောင်းအလျာ အဖြစ် ကင်ပွန်းတပ်သူတွေက တပ်နေကြပါသည်။

ကျွန်မတို့ကြားခဲ့ဘူးတဲ့ အိန္ဒိယရဲ့ ဝန်ကြီးချုပ်ဟောင်း အင်ဒီယာဂန္ဒီ အပြင် အခုအချိန်မှာ အိန္ဒိယနိုင်ငံ ရဲ့ သမ္မတ ဖြစ်တဲ့ ပရာတီဘာဒေဝီဆင်းပဿီ ကိုလဲ အာရှရဲ့ အမျိုးသမီး သမ္မတ အဖြစ် တွေ့နေရပါပြီ။

ဘင်္ဂလားဒေ့ရ်ှနိုင်ငံရဲ့ ဝန်ကြီးချုပ်ဖြစ်တဲ့ ဟာဆီနာ ကလဲ လုပ်ကြံခံခဲ့ရတဲ့ ဘင်္ဂလားဒေ့ရ်ှသမ္မတဟောင်း သူမဖခင်ကြီးရဲ့ ခြေရာကို နင်းလို့ အာရှရဲ့ အုပ်ချုပ်သူ အမျိုးသမီးတစ်ဦး ဖြစ်လာခဲ့ပါသည်။

အိမ်နီးချင်းဖြစ်တဲ့ ထိုင်းနိုင်ငံက ယင်းလတ်ရှင်နာဝပ်ကလဲ ၂၀၁၁ မှာ သူ့အကို သက်ဆင်ရှင်နာဝပ်ရဲ့ ရာထူးကို ဆက်ခံခဲ့သူ ထိုင်းအမျိုးသမီး ဝန်ကြီးချုပ်ဖြစ်လာခဲ့ပါသည်။

ကျွန်မတို့ မြန်မာနိုင်ငံမှာလဲ ၂၀၁၂ ဧပြီလအတွင်းမှာ ကျင်းပမယ့် ကြားဖြတ်ရွေးကောက်ပွဲမှာ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်က ပါဝင်ယှဉ်ပြိုင်ဖို့ ပြင်ဆင်နေတာကိုတွေ့နေရပါသည်။

ဒါပေမယ့် သဘာဝတရားအရ အားနွဲ့သူ မိန်းမသားများအတွက် အန္တရာယ် အငွေ့အသက်က နေရာတိုင်းမှာ ရှိစမြဲ။ စိတ်ဓါတ် ကြံ့ခိုင်သော နိုင်ငံ့ခေါင်းဆောင်ပင် ဖြစ်လင့်ကစား အားနွဲ့သူသည် အားနွဲ့မြဲ။ မဟာဖိုဝါဒကို လက်ကိုင်ထားသူများရဲ့ ပစ်မှတ်ဖြစ်ရစမြဲ။ ဥာဏ်ပညာ ကြီးမားလင့်ကစား ဘုန်းကံခြင်းယှဉ်ပါက ယောက်ျားသားများ၏ နောက်တွင် ခြေတစ်လှမ်းကျန်ရစ်စမြဲ။

အထူးသဖြင့် နိုင်ငံရေး မတည်ငြိမ်သောနိုင်ငံ အတိုက်အခံပါတီတွေများသော နိုင်ငံတွေမှာတော့ နိုင်ငံ့ခေါင်းဆောင်တွေ ခေါင်းဆောင်ဖြစ်နိုင်ခြေရှိသူတွေ သက်ဆိုးမရှည်တတ်ကြပါ။ အတိုက်အခံပါတီတွေရဲ့ လုပ်ကြံခြင်းကို ခံရတဲ့ သာဓကတွေကို ကွယ်လွန်သူ အမျိုးသမီးဝန်ကြီးချုပ်ဟောင်း အင်န္ဒီယာဂန္ဓီနဲ့ ပါကစ္စတန်နိုင်ငံရဲ့ ဝန်ကြီးချုပ်ဟောင်း ဘနာဇီယာ ဘူတိုတို့ရဲ့ သမိုင်းတွေထဲမှာ တွေ့ခဲ့ရပါသည်။

ဘာပဲပြောပြော ၂၀၁၂ ဟာ ကျွန်မတို့ အာရှကမ္ဘာကို အမျိုးသမီးတွေက ကိုင်လှုပ်မယ့်နှစ်တစ်နှစ်လို့လဲ ပြောလို့ ရနိုင်ပါသည်။

ဘုရားဆုပန် အမျိုးကောင်းသားများလိုပဲ ပုခက်လွှဲသော လက်များကလဲ ကမ္ဘာကို ပြောင်းလဲမှု ပေးနိုင်သလို အေးချမ်းသော အရိပ်အာဝါသကိုလဲ ပေးနိုင်စွမ်းရှိမှာ သချာပါသည်။

အချို့ အချို့သော မိန်းမတွေကပုခက်လွဲဖို့ သက်သက် လူဖြစ်ကြပါသည်။

အချို့ အချို့သော မိန်းမတွေကတော့ ပုခက်ကိုကျော်ပြီး မြင်နေရတဲ့ ပြတင်းပေါက်တွေကို စူးစမ်းဖို့ လူဖြစ်လာကြပါသည်။

အချို့အချို့သော မိန်းမတွေကတော့ ပုခက်လွှဲနေရင်း တချိန်တည်းမှာပဲ ကမ္ဘာကို အုပ်စိုးဖို့ လူဖြစ်လာကြပါသည်။

(Gulf News မှာ တွေ့ရတဲ့ သတင်းတစ်ပုဒ်ကို ဖတ်မိရာကနေ ဒီပို့စ်လေးဖြစ်လာရခြင်းဖြစ်ပါသည်။ လိုအပ်သော အချက်အလက်များကို လက်လှမ်းမီသလောက်ရှာဖွေ ဖတ်ရှုထားခြင်းဖြစ်ပြီး တစုံတရာ အမှားအယွင်းရှိပါက စာရေးသူ၏ အားနည်းချက်ပဲ ဖြစ်ပါသည်။ ဓါတ်ပုံကိုတော့ Gulf News မှ နီနို၏ မူရင်းပုံလေးကို ယူသုံးထားပါသည်။)

စာဖတ်သူအပေါင်းနှစ်သစ်မှာ ရွှင်လန်းချမ်းမြ့ကြပါစေ။

2 comments:

မြသွေးနီ said...

ဒီနေ့ခေတ်မှာအမျိုးသမီးတွေ လူမျိုးဘာသာမရွေး တန်းတူညီမျှ အခွင့်အရေးတွေ ရလာကြတယ် တကယ့်ကို ၀မ်းသာမိတယ်။ မဟာဖိုဝါဒတွေ ကြီးစိုးမင်းမူခဲ့တဲ့ ခေတ်တွေ ကုန်ဆုံးသွားခဲ့ပါပြီ။ ကျားမမခွဲခြားပဲ နိုင်ငံတကာနဲ့ ရင်ဘောင်တန်းပြီး တန်းတူရည်တူအစွမ်းပြနိုင်လာကြတာက သက်သေမဟုတ်ပါလား နှင်းရေ...

♫♪★လွမ်းပိုင်ရှင်★♪♫: said...

အရမ်းကောင်းတဲ့ အက်ဆေးရှည်လေးကို ဖတ်သွားပါတယ်နော် လေစားခင်မင်စွာဖြင့် (လွမ်း)

My Blog List